‘A casa mia

Featured image

A casa mia
china i miseria,
ricca d’amuri.
Pipi e patati
tutti i duminichi;
suli e fami
eh… quantu nd’ha mangiari!

A casa mia
adduru d’alivi ammaccati
di manu
d’ottansei anni.
Viardi di muntagni
vagnati du jummi
criscinu scuarni
e dispiaciri.
Ma ‘ntra na via
di nduv’è la casa mia
ci nd’è di cosi belli:
Ci su li vecchji ca chjiatanu!
E parranu, parranu
e un sannu c’hanu i diri.
Passa n’ambulanza
e tutt’allu barcuni.
E l’hamu i sapiri
i fatti i l’atri!
I cchi vi meravijjati?

Cumu merinu sti rosi
allu barcuni miu
mi dispiaci sulu
ca su di plastica
e unn’adduranu
‘i ricordi.

Ah… a casa mia
vrusciata du suli
du primu matinu,
quandu alla mpressa
a nonna mia mintìa
i pumadora a siccari:
‘’Sinnò si linchjinu i muscarialli’’
mi dici sempri.

A nonna mia è la casa mia.
Randi quantu ad illa!
Sé, a nonna mia è na barca,
na barca ca pisa nu quintali,
ma è bona, a nonna mia.
M’ha sempri datu tuttu,
A Guastella, i vrascioli,
sutta natali ‘u Turruni!
M’ha datu amuri,
m’ha datu na casa,
m’ha datu u cori.
E mi lassa, tutti i santi juarni
i memorii d’atri tiampi,
quandu ti lavavi
all’acqua du jummi.
Ca mo è luardu,
fhitusu! Un ci po mancu calari i piadi!

E’ bella… a casa mia.
Viju u Castiallu di cca!
E s’u viju, puazzu immaginari
tanti storii, tanti viti
ca mo un ci su cchiù.
E si cci su, su bbecchi!
Ma miajju vecchi, e no mu mi scuardu!

A casa mia è fatta i petri.
Petri randi e niguri,
petri vecchi,
cumu chilli du salaturu.
Chilli ca momò a nonna mia
sta mintiandu supa alivi
e supa i mulingiani.
‘’’Mparati Fhijjamma,
‘mparati ca riasti ‘mparata,
‘mparati a fari
a giardiniara
l’alivi ammaccati
i pumaduari siccati!
ca quandu un c’è nnenti
un ti piardi.
E s’avissi di viniri ancunu
un scumparisci
Fhijja mia.’’

A casa mia è nu manicomiu
tutta scali scali
na stanza supa l’atra.
Chi buliti, è na casa vecchia,
Sgallata, ‘nda passatu guerri.
Ma ha sapiti a cosa chiu bella
qual è?

Vidiri ‘mpena matina
‘a spera du suli ca mi
tajja l’uacchi!
Vidiri l’alberi viardi viardi
cumu u mari
ammareggiatu!
Sintiri l’adduru
di vrasceri ‘nto viarnu!
Chillu viarnu ca sa
di cravuni e corchi ‘i mandarinu!
E li manu ti si conzanu
niguri.
Niguri cumu u luttu.

A casa mia era nigura
mo ‘mbeci l’amu pittata
e du pittu ha nisciutu
u culuri du suli
e quandu mi ricuajju
ogni bota, ogni santissima vota
mi ricriu!
Mi siantu u cori arribbillatu!!!
…E puazzu viaggiari
puazzu muriri ‘mparadisu
supa n’atra terra,
puazzu vidiri tutti i mari du mundu,
sintiri l’adduru du desertu
l’adduru d’i croissant,
di l’uajju di Monoi,
ma vu dicu:
Sintiri l’adduru
di linticchi, ca cocinu
‘ntra na tiella i crita
è la gioia chiù randi
di tutta a vita.

Annunci

3 Comments

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...